بلوچستان ءِ مہروانیں بچ شہید امتیاز زہری عرف دلوش مہراب مہر

بلوچستان ءِ مہروانیں بچ شہید امتیاز زہری عرف دلوش
مہراب مہر
مروچی سنگتے ءَ من ءَ عکسے پیش داشت عکس ءَ چارگ ءَ گوں جان ءِ پٹ پاد آتک انت لاگریں سبزا رنگیں ورنائے ککانی پہنات ءَ کہور ءِ تہا راستیں دست ءَ کرنڈ کپتگ ات پاد ءِ تیرے مان آتکگ ات کہ ھون ٹٹر بستگ اتنت یک تیرے آئی چپیں نیمگ ءِ ہڑب ءَ مان آتکگ ات یک تیرے آئی راستیں چم ءِ سرا مان آتکگ ات کہ آئی راستیں نیمگ ءِ بہر برتگ ات آ ھشک ات وتی ماتیں گلزمین ءِ سینگ ءَ واب کپتگ ات آئی چارگ ءَ گوں دلوش تو ہم ماتیں گلزمین ءِ خاترہ وتی فرض پیلو کرت من ءَ ہما روچ یات آتک انت کہ زمستان وتی گڈی ساہ ءَ دیگ ءَ ات ما قلات ءِ سارتیں ڈگار ءَ پاد ایر کرتگ اتاں شور ءِ کسانیں چپ ءُُ چوٹیں کوہاں چاران سنگتانی کرءَ سر بوتگ اتاں سنگتاں مزنین وہدے بوتگ ات من ندیستگ اتاں بازیں سنگت ہنچیں اتنت کہ من نام اش اشکیتگ اتاں بلے جندانی نہ دیستگ اتءُُ بازیں سنگت مئے گندگ ءِ خاترہ زہیریگ اتنت ہما سنگتان چہ چیزے سنگت مرچی مئے نیام ءَ ساڑی نہ انت ایوکہ آہانی ترانگ پشت کپتگ انت ہر انسان کہ زندگ انت بے قدر انت بلے مرگ ءَ رند آ آہوگ چم ءِ بیت اے چاگرد ءِ علم ءُُ زانت انت کہ ہما چاگرد ءَ رسیت ءُُ ہمے علم ءُُ زانت ءِ پشدر ءَ آ ہم انساناں ہما شاہیم ءِ تہہ ءَ کیل کنت دانکہ آ زندگ انت آ بے مٹ نہ انت آ مٹ بیت آئی ھیال ءُُ مارگ بدل بنت آ ئی سوچ بدل بیت آئی تہہ ءَ ہرچ وڑیں بدلی کئیت آ یک پیم ءَ نہ بیت شر ہم بیتءُُ بد ہم۔ ہمے سوب انت کہ دانکہ انسان زندگ انت چاگرد ءِ گواچنین علم ءُُ زانت ءِ ردءَ بے قدر انت وہدیکہ آ مریت گڑا آئی چاگردی قانون ءِ ردا ہچیں بدلی ءِ نئیت بس ایوکہ آ بدن مٹ بیت بلے آئی سوچ ءُُ فکر یک پیم ءَ مانیت ہمے سوب انت کہ مرتگیں مرد زندگ کنگ بنت ءُُ ہما مرُدگ کہ وتی مَرگ ءِ فیصلہ ءَ یک اجتماعی سوچ ءِ خاترہ بکنت آ تاں ابد مانیت ءُُ ہمے وڑیں کارست چاگرد ءُُ راجاں وتی ھونان چہ زندگ کن انت من یک انچیں کارستے بابت ءَ گپ ءَ اوں کہ آ من ءَ پجہ کاورت بلے من آئی ءَ نزانت شور ءِ کوہاں کہ زمستان وتی گڈی ساہ ءَ دیگ ءَ ات من گوں یک ورنائے ءَ دیم پہ دیم اتاں کہ مدام منی کرءَ کات ءُُ سیاست ادب ثقافت ءِ جتا جتائیں بنگپانی سرا بحث کرت باز جست پرس کرت من سنگتانی دپ ءَ آئی نام اشکیت کہ دلوش توار ءَ اتنت ئے لاگریں سبزا رنگیں ورنائے ات آئی لاغری ءِ سوب آئی محنت ات کہ ہر کار ءَ گون ات ءُُ ہر کار ءَ وت کنگ لوٹ ات ئے آ دیگ ءَ ٹہینت ئے من ءَ چاہ ءِ خاترہ گوانک جت آ سرپد ات کہ من آئی وڑا چاہ باز وراں۔ من ءُُ آدو پہ دو بحث کرتاں ہر بنگپ کہ آئی دل ءِ تب ءَ ات ہمائی بابت ءَ جست کرت کہ تئی ھیال ءَ بلوچستان ءَ کجام نظام شرتر بیت من وتی وس ءَ کرت بلے آ ہچ منگ ءَ تیار نہ بوت من ہرچ نظام ءِ کہ بگشتینان آئی پسو نہ ات آ یک مردمے ءَ نہ منئت ئے من آئی تہہ ءَ وترا گندگ ءَ اتاں من سرپد اتاں کہ ہیل کنگ لوٹیت اگاں ہو ہو ءَ پسو برسیت گڑا بحث دیم ءَ نہ روت بس دگہ گپ نہ بیت نوکیں ھیال ءُُ مارگ دیم ءَ نیاینت آ ہمے ھیال ءَ گوں من ءَ گوں گپ کرت بحث کرت ما داں دو دو سہ گھنٹہ یک کش ءَ ھبر کرتاں آ ہم باز ھبر کرت انچو من۔ ما دوئیں یک وڑءَ اتاں آئی ءِ رائے ہر چیز ءِ باروا جتا ات آ چاگرد ءِ دوومی مردمانی وڑءَ نہ سوچ ات آئی ھیال جتا اتنت آئی روایتی میری معتبری ءَ سک بد کات چاگردی قانون آئی ءَ دوست نہ بوت انت آ چاگرد ءِ قانونان چاگرد ءِ ضرورتانی بنیاد ءَ جوڑ کنگ لوٹ ات ئے آئی ءَ دنیا ءِ زانتکار وانتگ اتاں آ سرپد ات کہ ما باز پشت آں۔ مارا وتی توک ءَ بازیں بدلی آرگی انت ہمے سوب ات کہ آ بی ایل ایف ءُُ بی ایل اے ءِ پالیسیانی سرا باز ہورتی ءَ گپ و تران کرت آ بی ایل ایف ءِ کیمپ ءَ ٹریننگ کرتگ ات آ بی ایل ایف ءِ کیمپ ءَ بازیں وہد گوازینتگ ات اودءَ سنگتانی تب ءُُ مزاج ءَ ہورتی ءَ چاریتگ ات آئی ءَ دوئیں گلانی بازیں رہ ءُُ رہبندانی سرءَ گپ کرت ۔آ بی ایل ایف ءَ چہ رندا بی ایل اے ءَ ہوار بوتگ ات آ روایتانی سک ھلاپ ات آ تنظیم ءُُ جنگ ءِ وڑ ءُُ پیماں سرجم ءَ بدل کنگ لوٹ ات ئے آئی گپ اوتاک ءِ سنگتانی تب ءِ گپ نہ اتنت پرچیکہ جنگی چاگرد ءِ تہہ ءَ تھیوری پشت ءَ کپ ایت عمل زور بیت آئی ھیال ءُُ مارگ گیشتر تھیوری ءَ گوں بندوک اتنت ءُُ چاگرد ءِ تب ءِ ھساب ءَ نہ اتنت بلے آئی بازیں ھبر راست اتنت ءُُ آئی بحث مباحثہ یک شل ءَ برجاہ اتنت من ءُُ آگڑا سک باز گپ کرتاں آ بندات ءَ سوشلسٹ ءِ بوتگ ات آ لال خان و ایلن وڈڈ ءِ بازیں مضمون وانتگ ات آئی ءَ مارکس ءُُ لینن ءُُ ماؤ ءَ وانتگ ات آئی ءَ فلسفہ ءِ بنزہ ءَ آپ وارتگ ات آ وت یک قبائلی چاگردے ءَ وتی چم پچ کرتگ ات آ ئی پت وتی ٹک ءِ سردار ات۔ آئی ردوم یک سردارے لوگ ءَ بوتگ ات۔ بلے آئی ءَ کس پجہ نیاورت ئے کہ آ یک سردارے چک انت پرچیکہ آئی زند نندگ ءُُ پاد آہگ گپ ءُُ ھبر فکری ءُُ بزگیں بلوچ ءِ وڑءَ اتنت۔آئی ءَ وتی گوست ءَ دیم ءَ ایر کرتگ ات ءُُ باندات ءِ خاترہ گام جنئگ ءَ ات آ وتی چاگرد ءِ خاترہ یک رژنائیں بانداتے ھیال زرتگ ءُُ آرتگ ات آ مدام سوچانی زر ءَ اوژناگ کنان ات آئی لاگربوہگ ءِ سوب اوں آئی ہمے تب ات کہ آئی ءَ کس ءِ دیم ءَ وتی بستار پیش نہ داشت۔ آ آجوئی ءِ فکر ءَ گوں کپتگ ات آ ایوکہ یک سرمچارے ات۔چہ کسانی ءَ بگر داں وتی شہادت ءِ روچ ءَ آئی نزدیکیں ہمراہ ہمے گشنت کہ آ چہ کسانی ءَ قبائلی راہ ءُُ رہبندانی ہلاپ ات چہ کسانی آئی بیل کوپگ ءَ کرت ءُُ گوں وتی بزگراں وتی ملک ءَ آپ بست۔ چاگرد ءِ دومی مردم آئی اے عمل ءَ وش نہ بوت انت ۔کسے کہ آئی اے عمل ءِ سرا گپ بکرتین آئی ترشپ ایں دلیلانی جواب گوں آہاں نیست ات ہمے سوب ات کہ کس آئی کار ءَ کار نہ داشت ئے۔آ زانت انت کہ آ زانتکارئے بلے آ وت بزگ ایں سادگیں بلوچے ات آ اوں بزگی ءَ وتی زند ءَ تیلانک دیان کرت ءُُ آ وتی وطن ءِ سرجمیں چاگرد ءَ ہرچ ردءَ بدل کنگ لوٹ ات ہمے ہیل ءُُ عادت آئی ءَ چہ کسانی ءَ گون اتنت ہمے زانت آئی ءَ چکرینت ءُُ آ ئی ءَ سوشلسٹانی کیمپ ءَ برت ءُُ آ جدءُُ جہد ءِ تاکبند وانتاں وتی چاگرد ءَ علمی ءُُ شعوری حوالہ ءَ پوہ کنگ ءِ جہد کرت۔ بلے آئی تن نہ پرشت آہمے تن ءَ پروشگ ءَ چکران کرت کہ گڈ سر ءَ آ آتک ءُُ آزادی ءِ ہمسفر بوت آئی ءَ وتی علاقہ ءِ تہہ ءَ قبائلی راہ ءُُ رہبنداں بازہورتی ءَ دیستگ ات آئی ءَ ہمے رہبند دوست نہ بوتگ اتنت ہمیشانی سک ھلاپ ات آ مدام راجی برابری ءِ گپ کرت وہدیکہ مئے بحث بوت آ ایوکہ ہمے گپ ءِ سرا زور دات کہ بلوچ وطن ءَ سوشلسٹ نظام گہتر انت۔ بلے آ اے گپ ءُُ بحث ہمے خاترہ کرت انت کہ گیشترہیل بکنت آ سرپد بوتگ ات کہ بلوچستان ءِ آجوئی ءَ رند قبائلی چاگرد آ وڑ ءَ نہ مانیت کہ آئی ءَ چہ کسانی ءَ دیستگ آ تپاک کرت بلے پد ءَ ہم آئی ءَ وتی ہندی سردارانی زند ءُُ وڑ دیستگ ات ہمے سوب ءَ آ ہچ منگ ءَ تیار نہ بوت آ زانت ئے کہ آئی ڈیھ ءِ دژمن ہمے شومیں سردار انت کہ مروچی پاکستان ءِ لشکر ءَ گون انت۔ آ بلوچستان ءَ روکیں چراگے گندگ لوٹ ات آ دلپاک ءُُ ایمانداریں سنگتے ات آئی ءَ دنیائی ہچ لوٹ ءُُ گزر نیست ات آئی جراں بگر دا چوٹ ءَ آئی ءَ یک چیزے شوق نیست ات اگاں آئی ءَ شوق است ات گڑءَ کتاب ءِ وانگ ءِ ات۔ ضرورتءِ ردا آئی ءَ ہرچ وڑیں تپنگ یا چیزے بداتین ئے آئی ءَ زرتگ ات ۔ آ درویش تبیں کارستے ات آئی ءَ سہ چار سال ءَ کدی لوگ ءَ روگ ءِ واہگ نداشتگ ات آئی تچک ءُُ راستیں فکرے ات آ وتی ڈیھ ءَ آجو کنگ ءِ ڈبہہ وتی کوپگ ءَ زرتگ ات وت ءَ دنیائی ہرچ لوٹ ءُُ گزر ءَ چہ وت ءَ آزات کرتگ ات آ زانت ئے کہ اے دنیا ءِ لوٹ انت اے یک انسان ءِ نزوری انت۔کہ دنیائی لوٹ ترا نزور ترینیت آئی ءَ فلسفہ ءَ ہورتی ءَ وانتگ ات ہمے سوب ات آئی ءَ ہچ چوشیں چیزے دوست نہ بوت آئی منزل دنیا ءِ لوٹ ءُُ گزراں چہ سک باز مزن ات آئی چم آزمان ءِ رژن ءَ سک اتنت ءُُ آ ہما تک ءَ سفر کنان ات۔ درتگیں چوٹ ءُُ درتگیں پچاں ءُُ وتی بزگیں تب ءَ گوں بلوچ ڈیھ ءَ دنیا ءِ برابری ءَ آرگ ءِ واب گندگ ءَ ات آ سرپد ات کہ واب گندگ یک انسانے ءَ عمل ءِ کنڈ ءَ بارت ءُُ آئی ہمے جہد ءُُ کوشست ات کہ آئی ءَ بازیں سنگتانی دل ءَ وتی قدر جوڑ کرتگ ات۔آ زانت ءِ چراگے ات چنکس مزن ات من گشت نہ کناں بلے آئی ہر گپ یک زانندہ ایں مردمے ھیا ل ءُُ مارگ اتنت۔ آئی ءَ وتی راج ءِ ہر ہند ءُُ دمگ ءُُ ہرچ دود ءُُ ربیدگ ءِ علمی حوالہ ءَ گپ کرت آئی ءَ ہچ پڑ ءَ وترءَ پشت ءَ نہ داشتگ ات آئی ءَ جنگ ءِ میدان ءَ ہم وتی گام جتگ ات آ باز لائق ایں جنگول ءِ زانگ نہ بوت بلے آئی ءَ وتی بوج زرتگ ات روان ات۔ءُُ داں گڈی روچ ءَ آئی کوپگ ءَ آئرا گون ات۔ آئی ءِ توک ءَ یک عالمے زندگ ءُُ سلامت ات بلے آ ہما چاگرد ءِ لوٹوک ات آئی ءَ رسگ ءَ نہ ات آئی ءَ وتی ہرچ واہگ ءُُ ارمان زمین ءِ خاترہ ندر کرتگ ات مرک برحق انت بلے آئی ءَ وتی مرک گچین کرتگ ات شور ءِ کوہاں گوں آئی ہواری ءَ روچ گوست انت وخت روان کرت بلے آئی نقش منی چمانی تہہ ءَ ات زند انت کہ وتی سفر ءَ چو شدیکیں مزار ءَ یک شل ءَ برجاہ داشتگ من واتر گوں آئی ءَ دوچار کپتاں اے رند ءَ آئی گپ گیشتر زمینی اتنت اے رندی آ من ءَ گوں گپ کرت گڑا آئی گپ جند ءِ تجربہ ءِ گپ اتنت آئی ھیال گوں تھیوری ءَ ہوار میدان ءَ پکیتگ اتنت آ سک ہیرتیں سرحالانی سرا گپ ءُُ تران کرت آ نون سر پد ات کہ آ جوئی ءَ باز وہد لوٹیت ءُُ اے زمین وتی چکاں وران کنت چیزے روچ ءَ پجی بوہگ ءَ رند یک روچے آ گوں چیزے سنگتاں شپ ءَ سفر بندات کرت آ ناگاہی بولان ءِ تل ءُُ ول ءُُ تاں ہرنائی ءِ کوہانی تل ءُُ توک ءَ روان ات آ یک باوری ایں سنگتے ات ہمے سوب ات کہ آ گیشتریں ذمہ دارانی کرءَ ات آ زانت ئے آ سر پد ات کہ اے سفر نوں دراج انت وہد لوٹیت وتی جند ءِ مھلوک ءِ سوچ بدل کنگ لوٹیت رند ءَ دنیا بدل بوت کنت۔ دانکہ تئی جند ءِ سنگتانی سوچ یک پیم ءَ مہ بیت گڑا بدلی آرگ بوت نہ کنت۔آئی ءَ ہرچ ارمان داشتگ ات آئی ءَ زند ءَ سرجم نہ بوت انت بلے ہمے الم ءَ است ات کہ آ یک یاگی یے ات۔ کہ آئی ءَ پت ءِ مال ءُُ مڈی یل دات ءُُ ہما چاگردی برزی جہلی است اتنت آہاں کلا ں پروشت۔ ءُُ ہمے قبائلی چاگردءَ آئی ءَ وتی یک جتائیں پجار ئے جوڑ کرت مرچی دلوش دلوش انت امتیاز زہری زانگ نہ بیت۔ آ امتیاز ات بلے آئی توک ءَ یک یاگی ایں دلوش ءِ زندگ ات ہمے دلوش ات کہ آئی ءَ چاگردی ہرچ پد منتگیں راہ ءُُ راہبندانی ہلاپ ءَ پرمات ئے۔ آئی ءَ اوں دلوش ءِ ہواری ءَ بدل بوہان بوت۔ آئی ءِ تہہ ءَ ہچ چوشیں چیزے نیست ات کہ آئی نزوری بوت بکنت آئی اخلاق بے مٹ انت آئی رویہ گوں مستریناں کستریں برات ءِ وڑءَ ات وتی کستریناں چہ آ مستریں برات ءِ وڑءَ ات۔آئی ءَ ہرچ رشتہ وتی کرتگ ات ۔ آ مدام چیزے نہ چیزے ہیل کنگ لوٹ ات آئی ءَ لیب ءُُ گوازی ءَ ھب نیست ات آ سرپد بوت کہ اے وہد زوالی یے۔ آئی گپ ہمیش ات کہ مدام بوان ءُُ نوکیں چیز ہیل بکن۔ اے امتیاز دلوش ات کہ مرچی آئی پت ءِ پجار آئی بچ انت آئی ءَ وتی چاگردی بستار ھاکاں دور داتگ ات آئی ءَ مزنین تاج ءِ سرءَ کرت آئی ءَ قبائلیت ءَ در کپان ءَ درائیں بلوچانی سینگ ءَ وتی جاگہ جوڑ کرت۔ اے لاش دلوش ءِ ات کہ بولان ءَ شش مارچ 2016ءَ ککانی پہناد ءَ کپوک ات۔ آئی پجی ءَ سہ دگہ سنگت اوں شہید بوتگ اتنت۔ اے کلیں لاش سیوی ہسپتھال ءَ ایر اتنت بلے کس ءَ ایشاں وتی نہ کرت۔سیاد وارث دوست عزیز کس آئی ءَ وتی نہ کرت۔ بلے ہمے بلوچستان کہ آئی آزادی ءِ خاترہ ءَ وترا قربان کرتگ آئی ءَ وتی چک وتی سینگ ءَ جاگہ داتگ ات۔ مرچی کس نزانت کہ آئی ادیرہ کجا انت بلے ماتین گلزمین زانت کہ آ وتی اے نازاکیں چک ءَ کجام جاگہہ ءَ وتی سینگ ءَ جاگہ داتگ۔آ وتی ماتین گلزمین ءَ وتی حق داتگ انت ماتیں گلزمین ءَ آئی ءَ وتی سینگ ءَ جاگہ داتگ ۔دوئیں مہروانیں مات ءُُ چک یکجاہ اتنت ۔ ہما گامانی رند کہ آ وتی ڈگار ءَ جتگ ات ہما گامانی سرءَ ہید ءِ ترمپ بلوچستان ءَ عزت بخشاتگ انت داں وتی زند ءِ گڈی روچ ءَ آ یک شل ءَ وتی مات ءِ سینگ ءَ گوں مہروانین ساہ ءَ پند جنان ات ۔مات سرپد ات کہ منی چک من ءَ دوست داریت نوں گیشتر آئی ءَ من وتی سرءَ چو خوار ءُُ عذاب بوہگ ءَ دیست نہ کناں ۔آئی خواری ءُُ عذابی ءَ آئی ماتیں بلوچستان مارگ ءَ ات آئی اوں وتی مات ءِ مہر دل نہ بوت آ اوں مات ءِ گشئگ ءِ ردءَ مات ءَ گوں ہوار بوت۔ مرچی آ وتی مات ءِ سینگ ءَ واب انت بلے بلوچستان ءِ ہر سنگ ءُُ ڈوک آئی مہر وانیں کرد ءَ پجہ کاریت آئی ءَ یات کنت۔آئی کرد گوں لبزاں بیان نہ بیت آئی کردءَ بلوچستان ءِ ہر کوہ ءُُ دمگ ہر کہور ءُُ جو ہر پٹ ءُُ میدان ہر جر ءُُ بوچ وت بیان کن انت۔ کہ زانتکاریں زانت ءِ بلوچستان ءِ سینگ ءَ گام جنان ءَ وتی جان ندر کرت داں جہاں است انت شہید است ماننت۔

Comments

Popular posts from this blog

میں اسلم کے عہد میں جی رہا ہوں تحریر : مجیدبریگیڈ سلمان حمل