بلوچستان نا مہر وانگا مار شہید امتیاز زہری عرف دلوش بلوچی آن بدل. مہراب مہر

بلوچستان نا مہر وانگا مار شہید امتیاز زہری عرف دلوش

بلوچی آن بدل. مہراب مہر

اینو سنگت اس کنے فوٹو اس نشان تس. فوٹو نا اُننگ تون جان نا پٹاک جک مسر. سوزا رنگ ءُ لاغر ورنا اس۔ ککاتہ پہناد ءَ ڈور ءَ ٹی راست انگا دو ءَ کرنڈو تموک اس. نتے تہ سم اس لگاس اس. کہ دترک تہ ٹٹر تفیسر. اسہ سم اس اونا چپ انگا ہڑب ءَ لگا سس. اسے تیر اس اونا راست انگا خن نا ذی ءَ لگا سس. کہ اونادروشم نا اسہ بشخ ءِ دریسس. او باریس اس. تینا لمہ وطن نا سینہ غا خاچاس اُس. اونا اُننگ تون اُست خوش مس کہ نی ہم لمہ وطن نا خاتر تینا فرض ءِ پورو کریس. کنے ہمو دیک یات بسر. کہ سیل٭ تینا گڈی دم تے اٹ اس نن قلات نا یخ انگا ڈغار ءَ نت تخاسن. شور نا چنک ءُ چپ ءُ چوٹ انگا مش تے ہُریسہ سنگتاتہ رہی ءَ سر مسوسن. سنگتاتے بلو وخت اس مسوس اس. ای خنتویسٹ. گڑ اس اندنو سنگت اسر. کہ ای اوفتہ پن تے بنگوسُٹ ولے خنتویسٹ. گڑاس سنگت ننا خننگ کن زہیری اسر. ہمو سنگتاتے آن گڑاس اینو ننا نیام اٹ افس. بیرہ اوفتہ یاداک سلوکو. ہر انسان کہ زندہ ئے او بے قدر ئے. ولے کہنگ ان گڈ او خزم خنی اس مریک. دا چاگرد نا علم ءُ پوہی ئے کہ ہمو چاگرد ءِ رسینگک ءُ اندا علم ءُ چائنداری نا پدپُشتءَ او ہم انسان تے ہمو تول ءَ ٹی کیل کیرہ ہر وخت اسکان کہ او زندہ و اوفتہ مٹ ارے او بدل مریرہ اونا خیال و احساس بدل مریرہ اونا سوچ بدل مریک اونا تیٹی ہر وڑ نا بدلی بریک. او اسہ وڑ اٹ مفسہ. جوان ہم مریرہ بد ہم. اندا وجہ ئے کہ ہرا وخت اسکان انسان زندہ ئے. چاگرد نا گواچنی علم و چائنداری نا رد اٹ بے قدر ئے وختس کہ او کسک گڑا چاگرد نا قانود نا رد اٹ اوٹی ہچو بدلی اس بفک. بیرہ اندخہ کہ او نا بدن بدل مریک. ولے اونا سوچ و فکر اسے وڑ اٹ سلیرہ. اندا وجہ ئے کہ کہوکا بندغاک زندہ کننگیرہ ءُ مردہ غاک کہ تینا مرک نا فیصلہ ئے اسے اجتماعی سوچ سینا خاطرہ کیرہ. و ابد اسکان زندہ سلیرہ و انداڈول نا کردارک چاگرد ءُ قوم آتے تینا دتر اٹ زندہ کیرہ. ای اسہ اندنو کردارا سینا بابت اٹ ہیت کننگ اٹ کہ او کنے درست کریکہ. ولے ای اودے تتویٹہ. شور نا مش تیٹی کہ سیل٭ تینا گڈی دم ءِ تننگ اس. ای اسے ورنا سیتون مون پہ مون اسٹ. کہ ہر وخت کنا رہی آ بسکہ و سیاست ادب ثقافت نا جتا جتاؤ موضوع تے آ بحث کریکہ. باز اریفیکہ. ای سنگتاتہ باہ ٹی اونا پن ئے بنگٹ کہ اودے دلوش توار کریرہ ۔
لاغر و سوزا رنگ و ورنا اس اسکہ. اونا لاغری نا سوب اونا محنت اس کہ ہر کاریم ٹی ہوار اس. ہر کاریم ئے تینٹ کننگ خواہسکہ او گڑو ءِ بیٹ کریکہ کنے چاہ نا خاطرہ توار کریکہ. او پوہ مسکہ کہ ای اونا وڑا چاہ باز کنیوہ. ای و او ارٹی ٹی بحث کرینہ. ہر موضوع کہ اونا تب آ لگاکہ اونا بابت اٹ اریفیکہ. نا خیالا بلوچستان آ ٹی ہرا نظام جوان مریک ای تینا وسے کریٹہ ولے او مننگ کن ہچ تیار متویکہ ای ہر نظام نا کہ پاروسُٹ اونا جواب نہ اسکہ ۔او اسے بندغے ہم منیتویکہ. ای اونا تیٹی تینے خنگگ اسٹ ای پوہ مسوٹہ. کہ ہیل کننگ خواہک. اگہ ہو ہو ٹی جواب رسینگ ئے گڑا بحث مونا ہنپک. بس پین گپ مفک. پوسکنو خیالاک مونا بفسہ. او اندا خیال اٹ کنتون ہیت کریکہ بحث کریکہ نن ارا مسے گھنٹہ اسے وڑ اٹ ہیت کرینہ. او ہم باز ہیت کریکہ اندن ای. نن ارتوماک اسے وڑ اسن اونا رائے ہر گڑا نا بابت اٹ جتا اس او چاگرد نا ایلو مخلوک انبار سوچ کتویکہ. اونا خیالاک جتا اسر اودے روایتی میری معتبری آن سخت باز بد بسکہ اودے چاگرد نا قانون دوست بتویرہ. او چاگرد نا قانون تے چاگرد نا ضرورت آتہ بنیاد ءَ جوڑ کننگ خواہیسکہ او دنیا'جہان نا چاہیندارتے خواناسُس. او چاہیسکہ کہ نن باز پد سلوک اُن. ننے تینا تیٹی باز بدلی اتوئی ئے. اندا وجہ اس کہ او بی ایل ایف وبی ایل اے نا پالیسی تا ذی ءَ باز خورتی اٹ گپ کریکہ. او بی ایل ایف نا کیمپ ءَ ٹریننگ کریس اس. اوفتا کیمپ اٹ باز وخت گدریفیس اس. اوڑے سنگتاتہ تب و مزاج ءِ باز خورتی ٹی خناسُس.
او ہر توما تنظیم تہ رھبند آتہ بارو اٹ باز خورتی ٹی ہیت و گپ کریکہ او بی ایل ایف آن پد بی ایل اے ٹی بسک. او روایت آتہ سخت خلاف اس. او تنظیم ءُ جنگ نا وڑ و ڈول تے مکمل بدل کننگ خواہیسکہ. اونا ہیتاک وتاخ نا سنگتاتہ تب نا ہیت ءُ گپ الویرہ. انتئکہ جنگی ماحول ٹی تھیوری پد ءَ سلیک عمل زور مریک اونا خیالاک گیشتر تھیوری تون تفوک اسر و چاگرد نا تب اٹ الویرہ ولے اونا بازا ہیتاک راست اسرہ. اونا بحث مباحثہ ہر وخت برجاہ اس. ای ءُ او اسل باز ہیت کرینہ. او اول سر اٹ سوشلسٹ اس اسکہ او لال خان او ایلن وڈڈ نا باز انگا مضمون تے خواناسُس او مارکس لینن و ماؤ ءِ خواناسُس. او فلسفہ نا چکل اٹ دیر کنگس اُس. او تینٹ اسے قبائلی چاگرد ءَ سیٹی ودی مسوس اس. اونا باوہ تینا ٹک نا سردار اس. اونا رودوم اسے سردارا سینا اُراٹی مسوس اس. ولے اودے کس تتویکہ. کہ او اسے سردارا سینا مارے. انتئکہ اونا تول٭ و بش ہیت و گپ فکری ءُ بزگ و بلوچ سینا وڑ اٹ اسر. او تینا گدرینگوکا وختے مونا تخاسس و آخوبت کن گام خلیسہ اس او تینا چاگرد نا خاطر اسہ روشنو آخوبت (مستقبل) سے نا خیال اس ارفیسس ءُ ایسوسُس. او چڑہ سوچاتہ سمندر اٹ آبازی کریکہ. اونا لاغری نا سبب اونا اندا تب اس کہ او کس نا مونا تینا حیثیت ءِ پاش کتویکہ او آجوئی نا فکر آتون ہوار تماسس او یکتا اسہ سرمچار اس اسکہ چنکی آن الیس تینا شہادت نا دے آ اونا خڑک نا سنگتاک اندا پارہ کہ او چنکی آن قبائلی رہبنداتہ خلاف اس. چنکی آن او بیل ءِ کوپہ ءَ کریکہ او تینا بزغر آتون تینا ملک اٹ دیر تفیکہ. چاگرد نا ایلو مخلوکے اونا دا وڑاک دوست متویرہ. کس اس کہ اونا دا عمل ءَ نا زی ءَ ہیت کروس اونا ذفت انگا دلیل آتہ اوفتون جواب متویکہ. اندا وجہ اس کہ کس اونا کاریم تیٹی کاریم تختویکہ. او چاہیسرہ کہ او پوہ و بندغ آ سے. ولے او تینٹ اسے بزگ و سادہ ہو بلوچ اس اسکہ. او اندا بزگی ٹی تینا دے تے دکہ تریسہ کریکہ. او تینا وطن نا غُٹ راج ءِ ہر وڑ اٹ بدل کننگ خواہیسکہ. ءُ اوڑتون اونا دا خُو چنکی آن تد اس ءُ اندا چائنداری اودے پیری تریسہ اودے سوشلسٹ آتہ کیمپ ءَ درے ءُ او جد وجہد نا کتباتے خوانا ءُ تینا چاگردے علمی ءُ شعوری حوالہ ٹی پوہ کننگ نا کو شست کرے. ولے اونا ملاسی کٹیتو او اندا ملاسی ءِ خلاس کننگ کن پیری خلیسہ کرے کہ آخر ءَ بسک ءُ آزادی نا ہمسفر مسک. او تینا علاقہ ٹی قبائلی راہ ءُ راہبنداتے باز خوڑتی اٹ خناسُس. اودے اندا رہبنداک دوست متویرہ اندافتہ سخت خلاف اس. او چڑہ قومی برابری نا ہیتے کریکہ وختس کہ ننا بحث مسکہ او یکتنا اندا ہیت ءَ زور تخاکہ کہ بلوچ وطن کن سوشلسٹ نظام جوان ئے. ولے او دا ہیتے اندا خاطران کریکہ کہ زیات ہیل کے. او پوہ مسکہ. کہ بلوچستان نا آجوئی آن پد قبائلی چاگرد دا وڑ اٹ سلپک. او چنکی آن خناسُس. او مناکہ و تینا علاقائی سردارتے خناسُس ہم. اندا سبب اس کہ او ہچ منیتویکہ. او چاہیسکہ کہ اونا وطن نا دشمن آک اندا سر دارک و. کہ اینو پاکستان نا لشکر تون ہوارو.او بلوچستان ءِ لگوکو چراغ اس خنگ خواہیسکہ. او اُست سفا ءُ ایماندارو سنگت اس اسکہ دنیائی ہچ گڑا نا خواہش تختویکہ. اودے پُچ آن الیس چوٹ اسکان ہچ گڑا شوق الویکہ اگہ اودے شوق اسکہ گڑا کتاب خواننگ نا اس. ضرورت ات اٹ اودے ہر وڑ نا توفک اس یا گڑا اس ایتوسر او ارفیکہ تہ. او درویش تبو کردار اس اسکہ. او مُسہ چار سال اسکان اُراغا ہننگ نا خواہش تختویکہ اونا سیدھا و گواچن و فکر اس اسکہ. او تینا ڈیھ ءِ آجو کننگ نا ذمہ ءِ تینا کوپہ غا ارفیسس و تینے دنیائی ہر ضرورتان آزاد کریسس او چاہیسکہ کہ دنیا اندن خواہک. داہر اسہ انسان نا نزوری ئے کہ دنیا نا ضرورتاک نے نزور کیرہ. او فلسفہ ءِ ھب اٹ خواناسُس. اندا وجہ اس کہ اودے اسے دونو گڑا اس دوست متویکہ. اونا مزل دنیا نا ضرورتان آن اسل باز بلن اس. اونا خنک آسمان نا رشنائی ءَ سخت اسُر. او ہمو کنڈ ءَ سفر کننگ اَس. ارنگوکو چوٹ و پچاتون ءُ تینا مسکین آ تب تون بلوچ ڈیھ ءِ دنیا نا برابری آ ہتنگ نا تغ ءِخننگ اسک. او چاہیسکہ کہ تغ خننگ اسہ انسانے عمل نا کنڈا دیک. او نا اندا جہد و کوششت اس. او باز سنگتاتہ است آ ٹی تینا قدر ءِ جوڑ کریسس. او چاہنداری نا چراغ اس اسک اخس بلن اس ای پاننگ کپرہ ولے اونا ہر ہیت اسہ چاہوک و بندغ آ سینا خیالاک اسر. او ہر پڑ آ تینے پد توتویکہ او جنگ نا میدان اٹ ہم گام خلکسُس. او باز لائخ و جنگول اس چاہنگتویکہ ولے او تینا بوجے ارفیسس. ہننگ اس و دا باریم آخری دے اسکان اونا کوپہ غا اس اونا تیٹی اسے عالم اس زندہ و سلامت اسک. ولے او ہمو چاگرد نا خواہوکس اس اودے رسینگنگ الویکہ. او تینا ہر خواہش و ارمان ءِ وطن کن ندر کریسس.. کہنگ برحق ئے. ولے او تینا مَرک ءِ گچین کریسس. شور نا مش تیٹی او نا ہواری ٹی دیک گدرینگسہ کریر. وخت ہنیسہ اس. ولے اونا نکش کنا خنتے ٹی اس. کہ زند بینگُن انگا شیر انبار تینا سفر ءِ برجاہ تخاس اس ای واپس اوڑتون ہوار تماٹ دا واری اونا ہیتاک زیات زمینی اسر دا واری ہو کنتون ہیت کریکہ گڑا اونا ہیتاک اونا تجربہ نا اسر. اونا خیالاک تھیوری تون ہوار میدان ٹی بسنگاسر. او باز خوڑتو موضوع تہ بابت اٹ ہیت کرے. او داسہ پوہ مسکہ کہ آجوئی باز وخت خواہک و دا ڈغارا تینا چنا تے کنیسہ کیک. گڑا اس دے ہوار مننگ آن گڈ اسے نن اس او گڑاس سنگتاتون سفراسے کن پیش تما. او ناگاہی بولان نا تل و ول تیٹی ہرنائی نا مش تیٹی سفر کننگ اس. او باوری ہو سنگت اس اسکہ. اندا سبب او ذمہ دار ءَ سنگتاتون ہوار اسک. او چاہیسکہ پوہ مسکہ. کہ دا سفر مرغن ئے وخت خواہک تینا جند نا مخلوک نا سوچ بدل کننگ خواہک. پدا دنیا بدل مننگ کیک. داسکان ننا جند نا سنگتاتہ سوج اسے وڑ اف. گڑا بدلی اتنگ مفک. او ہرا ارمان اس اُست اٹ تخاسس اونا زندئٹ پورو متویر ولے دا اسکہ کہ او اسے باغی اس اسکہ کہ او تینا باوہ' مال و مڈی تے یلہ کرے و چاگرد نا ہرا برزی شیفی اسر کلاتے پرغا. او اندا قبائلی چاگرد آ ٹی تینا جتاؤ حیثیت اس جوڑ کرے. اینو دلوش دلوش ئے امتیاز زہیری پاننگ پک. او امتیاز اس ولے اونا تیٹی اسہ باغی و دلوش ئس زندہ اس۔ اندا دلوش اس. کہ اودے چاگرد نا ہر فرسودہ راہ و راہبنداتہ خلاف پاریکہ. او ہم دلوش نا ہواری ٹی بدل مریسہ کرے. اونا تیٹی ہچ دونو گڑاس الویکہ. کہ او نا نزوری پاننگوس. اونا اخلاق بے مثال اسکہ اونا رویہ بلا تون چنکا ایلم انبار او تینا چنکا تون بلا ایلم انبار اسکہ. او ہر رشتہ ئے تینا کریسس. او ہر وخت گڑاس نہ گڑاس ہیل کننگ خواہیسکہ. اودے گوازی خوش بتویکہ.او پوہ مسکہ کہ دا وخت ءِ زوال کیک. اونا ہیت اندا اس کہ چڑہ خوان و پوسکنو گڑا ہیل کرک. دا امتیاز دلوش اس کہ اونا باوہ نا چائنداری اونا چنا نا وجہ آں مریک او تینا چاگردی حیثیت ءِ مِش تیٹی کریسس. او بلو تاج اس کاٹم ءَ کرے و قبائلیت آن پیش تمیسہ کل بلوچ قوم نا است ٹی جاغہ جوڑ کرے. دا لاش دلوش نا اس کہ بولان ءَ شش مارچ 2016 ءَ کک آتہ پہناد ءَ تموک اس. اونا ہواری ٹی مُسہ پین سنگت ہم شہید مسوسر. دا کل لاش آک سیوی نا ہسپتال آ تخوک اسر. ولے کس اس دافتے تینائی کتو. سیال وارث آک کس اوفتئے تینا کتو. ولے اندا بلوچستان کہ اونا خاطران تینا جان ءِ قربان کریسُر. گڑا تینا چنا تے تینا سینہ غا جاغہ تس. اینو کس تپک کہ اونا ادیرہ ہراڑاکن ئے. ولے لمہ وطن چاہک. کہ تینا دا نازاک انگا چنا ئے ہراڑے تینا سینہ ٹی جاگہ تسونے. ہر توماک مہروانگا چنا ءُ لمہ اسے جاغہ اسر. ہمو گام تے کہ تینا لمہ وطن کن خلکسس. ہمو گام تہ خلنگ خید نا پڑیک بلوچستان ءِ عزت بشخاسُر.تینا زند نا گڈی وخت اسکان او تینا لمہ نا سینہ غا تینا مہروان انگا ساہ تون گام خلیسہ اس. لمہ چاہیسکہ کہ کنا چنا کنے دوست تخک داسہ اودے تینا ذی ءَ دن خواری و عذابی ٹی خننگ کپرہ. اونا خواری و عذابی ءِ اونا لمہ بلوچستان محسوس کننگ اسکہ اودے ہم تینا لمہ نا مہر است متو او ہم لمہ نا پاننگ ءَ لمہ تون ہوار مس. اینو او تینا لمہ نا سینہ غا تنگانے ولے بلوچستان نا ہر خل ءُ ڈوک اونا مہروانگا کرد ءِ چاہک. اودے یات کیک. اونا کرد لوزاتون بیان مفک اونا کردے بلوچستان نا ہر مَش ءُ دامان ہر ڈور و جو ہر پٹ و میدان ہر جر و بوچ تینٹ بیان کیک کہ چائندار انگا پوہی آ بلوچستان نا سینہ غا گام خلیسہ تینا جان ءِ قربان کرےہراتم اسکان کہ جہاں ارے شہید امتیاززہری زندہ ئے

Comments

Popular posts from this blog

میں اسلم کے عہد میں جی رہا ہوں تحریر : مجیدبریگیڈ سلمان حمل